HR 熊:候選Waitlist 出頭天
發布時間: 2016/01/20 14:07
▲ 相片來源:iStock
一次又一次既失落,今次終於落入waitlist 既後選名單中,雖然完全揣測唔到究竟自己成數有幾高,又唔知身在隊頭定隊尾,未值得高興但至少得到一個假希望。
Waitlist等於大後備,最後能夠晉升到「坐正」既位置,係需要配合天時地利人和既強運!
正選拒絕offer,又或者同部門突然有人遞信辭職,公司為左唔想再重新洗錢出廣告接收申請,就係waitlist度試下抽唔抽到支好籤,機會就係咁樣落係你身上。
係被稱為難聽既「執二攤」嗎?
入到公司,俾身邊既同事知道你係waitlist入黎,即時睇低一線:
Waitlist啲二打六都入到黎,真係好好彩囉。
猛車邊有咩咁巴閉,可能做一陣就捱唔住。
其實一切跟足晒程序做,後備正選都係一樣。由當初申請份工,到老闆認為佢夠料可以俾一個面試機會,再心驚膽顫面對panel連珠炮發既問題,同樣既經歷,結果無辦法操控,仲比其他人承受多一重壓力,走多一步先黎到。
係老闆既決定,無洗出旁門左道,旁人又有咩資格認為waitlist一定差過正選?
係我地既角度,面試不過係一個印象同埋過程,並未代表佢一定適合做呢份工。有部分人面試技巧係特別出色,識得sell自己既優點,而且好健談令你想繼續同佢傾多幾句。
而工作態度和實戰表現呢?即使做reference check,而家好多大公司都講明「基於保密理由而不公開評核資料」,令我地難以短時間判斷到佢過往係實際工作上係點。
有經驗既經理們,就心水清就算揀左以為最岩心水既一位,一日未簽約確認offer,一日都需要抱住中獎心態。而waitlist 正正就係為左填補大獎隨時不翼而飛既情況而產生,所以waitlist 同樣會認真揀,揀唔到既寧願唔要。
入左waitlist既通常好心急知結果,打電話問人事部唔會有任何答案,小熊都好了解你十五十六既心情,不過保持口密係我地既專業。
唔好咁傻無了期去等待,先有定心理準備機會係極渺茫,要提醒自己繼續馬不停蹄去搵到有offer為止。跑唔出唔緊要,撲左個空囉囉攣既心情會更有動力去諗番究竟差啲咩先贏到,係未能好順口咁清楚介紹自己?應對唔到問題?抑或身體語言唔夠大方得體?
「名正言順」係打工黎講唔係咁重要,大家一向都知皇親國戚,心儀既靚仔靚女,可以純粹因為老闆鍾意就可以發圍上位。
一間公司成個申請入職既過程已經算係最公平既一關,入到黎點樣去建立形象、人事關係和爭取表現先係最大既挑戰,所以入waitlist唔可怕,最可怕係一見到呢個字就立即打擊自信,以為技不如人。
文章刊於作者HR熊 - 職場航行日誌 Facebook及個人網頁,TOPick 獲授權轉載。
撰文 : HR熊 - 職場航行日誌